Imbilin ni President Ferdinand Marcos Jr. iti Department of Tranportation (DOTr) nga adalen ti gakat nga ingato ti insurance payment coverage para kadagiti pribado a lugan nu kas bilang mairamanda iti aksidente iti kalsada.
Segun ken ni Presidential Communications Office Undersecretary ken Palace Press Officer Claire Castro, binilin ni President Marcos ni Transportation Secretary Vince Dizon a kitaen ti gakat nga i-adopt ti insurance system para kadagiti Public Utility Vehicles nu mayannatup ti private motor vehicles tapno masigurado ti patas a serbisyo a maala kadagiti kaso a pannakatay ken permanente a rangkap.
Kinuna ni Castro a maadal dayta a nalaing tapno makita nu rumbeng a maipatungpalen kas nayon a proteksyon para kadagiti amin a posible a mabiktima iti negligence wenno aksidente iti kalsada.
Nagpanawagan manen dagiti transport group iti Marcos Administration nga ingato ti gatad ti insurance coverage iti salinong ti Compulsory Third Party Liability a baybayadan dagiti motorista iti rehistro ken renewal iti luganda kasaruno iti trahedya a napasamak ti SCTEX toll plaza idiay Tarlac City a nakatayan dagiti sangapulo a tattao.
