Binilin ni Pres. Ferdinand Marcos Jr. ni Department of Public Works and Highways (DPWH) Secretary Vince Dizon a mangisayangkat ti inspeksyon iti Kalayaan Island Group (KIG) idiay West Philippine Sea.
Ti nasao a bilin ket kasaruno ti panaglukat ti Kalayaan Municipal Tourism Office dagiti tour packages ita a bulan.
Kayat ti presidente a makita ti sekretaryo ti posibilidad a panagpatakder dagiti airport ken pantalan tapno mapasayaat pay ti turismo iti lugar.
Kinumpirmaran ni Presidential Communications Undersecretary Claire Castro a nakasaritan ti presidente ni Dizon maipanggep iti nasao a banag.
Ti ili ti Kalayaan ket nabukel gapu iti KIG iti salinong ti probinsia iti Palawan babaen ti Presidential Decree nga inruar idi ni dati a Pres. Ferdinand Marcos Sr. idi 1978.
