Inladawan ti maysa a Political Analyst a nagulo iti sitwasyon ita idiay Senado kalpasan a nag-walkout kagiti kameng ti Minority Bloc kasaruno ti nabara a debate iti gakat a panangamyendar iti Senate rules tapno palubosan ti remote attendance ken electronic voting dagiti Senador.
Nangrugi iti diskusyon kalpasan nga impila ni Senador Rodante Marcoleta ti mosyon a palubosan a dumar-ay ti session dagiti senador babaen ti virtual setup ngem saan nga inanamungan ti minority bloc.
Iti pannaki-uman ti Bombo Radyo Vigan ken ni Atty. Michael Henry Yusingco, ti Senado ket collegial body nga agdedesisyon ken agtigtignay kas maibasar ti consensus iti majority of the members wenno miembro, ngem iti napasamak idi kalman ket napukaw ti collegiality iti Senado.
Segun ken ni Yusingco, ti saan a panagtitinnunos ita iti Senado ket mangipakita laeng nga imbes a trabaho iti yun-unada ket nakatutokda laeng no kasano a lamangan iti bangir a biang.
Impaganetgetna a saan a mapangnamnamaan ita iti Senado ta saandan nga ar-aramiden pay iti trabahoda a risuten dagiti parikot no diketdi pimpimanendan dagiti umili.
Innayonna nga adda majority ken minority iti Senado ket rumbeng nga agtunos dagiti senador tapno maipatungpal a nasayaat iti trabahoda.
Kabayatanna, impalagip ni Yusingco iti publiko a no kayatda a sukatan iti takder ita iti Senado ket nasaysayaat a saan laengen nga agbotos kadagiti clown ken agtatakaw, ken uray dynastic candidates no diketdi pilien ti non-dynastic candidates inton 2028 elections.
