Nagpanawagan ti Philippine National Police (PNP) iti insigida a panangsimpa ti cybersecurity measures kadagiti ahensya iti gobierno kasaruno iti agsina a panagatake kadagiti website iti Senado ken Kamara.
Segun ti PNP, agserbi a ballaag ti insidente a kasapulan iti naing-inget a seguridad kadagiti digital system iti gobierno kontra iti kumarkaru a pangta ti cyberattacks.
Immunan a naipakaammo a na-deface ti website iti Kamara idi Sabado, sumagmamano nga aldaw kalpasan a tinarget dagiti hacker ti official website iti Senado.
Inako ti maysa a grupo dagiti hacker iti responsibilidad kadagiti panagatake ken impaganetgetda a protestada dayta kontra iti korapsyon iti gobierno.
Binilin ti PNP Anti-Cybercrime Group a makikammayet kadagiti information technology ken cybersecurity personnel iti Kamara tapno tumulong iti maisaysayangkat nga imbestigasyon.
