Binabalaw ti Philippine National Police dagiti agwarwaras nga impormasion mainaig iti maipagarup a maipatungpal a gun ban iti intero a pagilian para iti maika-lima nga State of the Nation Address ni Presidente Ferdinand Marcos Jr.
Inlawlawag ti PNP nga awan ti nationwide a gun ban a naipatungpal iti mapasamak a SONA.
Segun ken ni PNP chief Gen. Jose Melencio Nartatez Jr., awan ti inruar a direktiba ti PNP iti panangipatungpal ti gun ban iti pagilian para iti nadakamat nga event, ngem agtaltalinaed latta nga epektibo ti linteg, lokal nga ordinansa, ken dagiti naidatag a security protocols.
Kas paset ti panagsagana iti seguridad ti SONA, istrikto nga ipatungpal ti pulisya dagiti panagannad iti panagitugot dagiti paltog ken dadduma pay a deadly weapons iti designated security areas ken dadduma pay a lugar.
Inallukoy ni Nartatez iti publiko a sumurot ken mamati laeng kadagiti impormasion nga iruar ti official communication channels ken liklikan ti panagiwaras ti saan a beripikado a post a mabalin a mangitunda ti fake news.
