Nakasaganan ti Philippine National Police (PNP), Armed Forces of the Philippines (AFP), ken provincial government ti Maguindanao para iti naisangsangayan ken kaunaan a parliamentary election iti Bangsamoro Autonomous Region in Muslim Mindanao (BARMM) a maisayangkat inton Lunes, Setyembre 14.
Naka-full alert ti PNP iti BARMM manipud idi Setyembre 11 agingga Setyembre 30.
Segun ken ni PNP spokesperson Allen Rae Co, umaboten iti 98 percent ti security preparations ti kapulisan, idinto a ti nabatabati a dua a porsiento ket para iti adjustment.
Nasurok 2.3 milyon a botante ken nasurok 600 a kandidato ti paset iti naisangsangayan nga eleksion para iti 80 a puwesto iti Bangsamoro Parliament.
Naipasidong met iti red alert status ti Provincial Disaster Risk Reduction and Management Council ti Maguindanao kas paset ti panagsagana iti kaunaan a BARMM election.
Naka-alerto ken naka-deploy metten dagiti emergency response team tapno dagus nga ag-responde iti aniaman nga insidente, sakbay, madama, ken malpas ti eleksion.
Gagem dagiti addang tapno masigurado a natalged, nakappia ken nasayaat ti mapasamak nga eleksion.
Kabayatanna, pinasingkedan ni Armed Forces of the Philippines (AFP) spokesperson Colonel Francel Padilla a nakasaganan amin dagiti addang a maipatungpal para iti seguridad iti kaunaan a parliamentary elections iti Bangsamoro Region.
