VIGAN CITY – Insanud ni Sta. Maria Mayor Boy Camarillo ti panagpiesta ti ili ken dagiti dadduma pay a mass gatherings tapno maliklikan ti panagraira ti coronavirus.
Maysa kadagiti kangrunaan a maipasardeng idiay Sta. Maria ket iti galyera agsipud ta adu dagiti tattao a mapmapan maki-galyera nga aggapu pay kadagiti naduma-duma nga ili.
Agsipud iti dayta, kidkiddawen ni Camarillo ti panagridam ti amin ken kasta met ti panangipakaammo dagiti umili kadagiti opisyal ti ili no adda dagiti agsangpet nga aggapu iti sabali a pagilian wenno probinsia tapno mamonitor da a naimbag ket masigurado a natalged da a sumangpet ken saanda a makaakar ti sabali nu bilang nakaptan da ti virus.
Ingunam-gunam ti mayor iti panagtitinnulong ti amin ken panangsurot kadagiti maiyetnag a pagannurutan tapno saan a kumaro ti nasao a sakit ken awan ti maapektaranna ditoy probinsia.
