VIGAN CITY – Kinumpirmaran ti Department of Foreign Affairs a maysa a Pilipina ti karaman a natay gapu iti heatstroke iti Hajj pilgrimage iti Saudi Arabia.
Segun ken ni Foreign Usec Eduardo de Vega, natay ti Filipina pilgrim idi June 16 gapu iti heatstroke ket dagus met laeng a naitabon kalpasan ti mano nga aldaw.
Nakabase idiay Riyadh ti nasao a Pinay ken saan a karaman iti Hajj delegation nga inorganisa ti National Commission on Muslim Filipinos segun iti Embahada ti Pilipinas idiay Riyadh.
Innayon ni Usec De Vega a nagipatuloden ti ahensia iti kamengda idiay Saudi Arabia tapno tulongan ti embahada ti Pilipinas idiay iti panangbantay ken panangtulong kadagiti Pilipino a pilgrim.
Mapatta-patta a 5,100 ti pakabuklan a bilang dagiti Pilipino a nakikaysa iti Hajj sipud idi Hunyo 14-19.
