Binalakadan ti Department of Foreign Affairs-Office of Migration Affairs dagiti Pilipino idiay South Korea nga agtalinaed a nakalma ken sumurot ti local advisories kasaruno iti declaration iti martial law.
Segun ti DFA, ti palagip ket inruar ti Philippine Embassy idiay Seoul kadagiti Pilipino nga agnanaed ken bumisbisita iti nasao a pagilian.
Indeklarar ni President Yoon Suk Yeol ti South Korea ti emergency martial law gapu iti agtultuloy a saan a panagtitinunos ti People Power Party ni Yoon ken ti kangrunaan nga opposition a Democratic Party maipapan iti budget bill inton sumaruno a tawen.
Segun ti presidente kasapulan ti addang tapno masalakniban ti pagilian manipud kadagiti puersa ti komunista ti North Korea ken tapno maikkat dagiti anti-state elements.
Ti martial law ket ti panagturay ti militar iti panawen ti emergency ken suspension ti normal civil rights.
