Inlawlawag ni President Ferdinand Marcos Jr. a saan nga agbaliw ti takder ti Pilipinas iti patangan maipanggep ti West Philippine Sea kasaruno ti panagsaritana iti State of the Nation Address (SONA) mainaig ti foreign policy iti pagilian.
Segun ken ni Marcos, mabalin latta a makigayyem ti Pilipinas iti sabali a pagilian uray agtultuloy iti panangilabanda ti soberanya iti teritoryo.
Kinunana a saan a gapu ta isalsalakan iti Pilipinas dagiti teritoryoda ken pappapigsaen ti military ket ibilangen a kalaban iti sabali a pagilian.
Maipalagip a kinuna ti presidente iti SONA nga agtalinaed a kalmado ken naanus iti Pilipinas iti baet dagiti posible a pangta iti teritoryo.
Kabayatanna, impaganetgetna nga iti kaano man ket saan nga isuko ti Pilipinas ti soberanya nga uray bassit laeng a paset ti masakupan ti pagilian.
