Iggem ti Houthi rebels dagiti siam a Filipino seafarer kalpasan a ti vessel-da nga MV Eternity C ket naatake idiay Red Sea iti daytoy a bulan kas kinumpirmaran ti Department of Migrant Workers.
Ti pakaammo ket inruar ti DMW kalpasan a nangiruar iti video ti Houthi rebels a nangkunaanda nga insalakanda dagiti mapukpukaw a crew members iti bulk carrier.
Ngem kinuna ni DMW Secretary Hans Leo Cacdac, ammodan ti napasamak kadagiti missing seafarers sakbay pay a nairuar ti video.
Malaksid ti pannakikammayetda kadagiti pamilia kadagiti siam a seafarer ket manarimaanen ti panagkiddaw ti gobierno ti Pilipinas babaen ti Department of Foreign Affairs (DFA) iti tulong dagiti friendly countries para ti pannakawaya-waya dagiti siam a Pilipino manipod ti kustodiya iti Houthi rebels.
Segun ken ni Cacdac, agtultuloy iti monitoring efforts da ken ti panangsuportar kadagiti pamiliada ta ipangrunada ti kinatalged ken repatriation dagiti amin a seafarer.
Maipalagip a naatake ti bulk carrier MV Eternity C iti daytoy a bulan ket naammoan a duapulo ket dua a crewmen iti nakalugan idi napasamak iti insidente a ti duapulo ket maysa kadakuda ket Pilipino.
Walo kadagiti Flipino crew member iti bulk carrier iti nakaawiden ditoy pagilian, tallo iti naireport a natay idinto a maysa iti mapukpukaw.
