VIGAN CITY – Nagyaman ni Ilocos Sur Polytechnic State College – Sta. Maria Pres. Dr. Gilbert Arce kadagiti agtultuloy a mangsupsuporta iti proyekto nga ipatungpalda tapno mapasayaat iti ISPSC kangrunaan iti industria ti agrikultura.
Iti pannaki-uman ti Bombo Radyo Vigan ken ni Arce, adda ti uppat a pulo a milion a pisos a pondo nga inkari ni Agriculture Sec. William Dar para iti Food processing and Food Products Research Innovation Center ken limapulo a milion a pisos met ti nailatang para iti Fisheries Research and Fish Products Innovation Center iti ISPSC-Narvacan isu nga agpapatangdanto kadagiti kaduana a stakeholders tapno matungpalda ti bilin ni Dar kadakuada nga inton Enero ket malpasen dagiti nasao a proyekto.
Malaksid ti dayta, baklayen ti Agriculture Department ti innem iti sangapulo nga ektarya nga extension ti ISPSC idiay San Juan para iti veterinary medicine nga idiayada a kurso.
Kabayatanna, naisayangkaten ti groundbreaking ceremony kadagiti nadumaduma a proyekto ti ISPSC Main Campus a pakairamanan ti Tissue Cultural Laboratory, Solar Power Irrigation System ken ti Feed Mill Facility.
