VIGAN CITY- Mapatta-patta nga umabot iti tallo gasut a milyon a pisos iti nadadael iti benneg ti agrikultura ditoy probinsiya ti Ilocos Sur gapu ti panagduprak ti Bagyo Ompong kas maibasar iti inisyal nga assessment ti provincial agriculture office.
Segun ken ni Provincial Agriculture Officer Constante Botacion, mapatta-patta a sangapulo ket lima ribo nga ektarya ti nadadael a kataltalunan a dagiti kangrunaan a naapektaran ket dagiti pagay nga adda pay laeng flowering maturity stage kas kadagiti karuruwar pay laeng iti dawa na ken saan pay a natangkenan, karaman dagiti natangkenanen ti dawa na ngem saan pay a naapit.
Ti agdama, adu pay a municipal agriculture office ti saan pay a nakaipasa ti report na isu a patien ti provincial agriculture officer a posible a dumakkel pay iti gatad dagiti nadadael iti benneg ti agrikultura.
