Ikkan ti pammadayaw ti gobierno dagiti miembro ti Philipine Inter-Agency Humanitarian Contingent a timmulong kadagiti biktima iti ginggined idiay Myanmar manipod April 1 agingga April 13, 2025.
Karaman iti programa ti maysa nga after-action review tapno adalaen iti nagbalin nga operasyon, dagiti sangsangwen a karit ken dagiti nagun-od a balligi ti grupo iti humanitarian mission-da.
Buklen ti Philipine Inter-Agency Humanitarian Contingent dagiti kameng ti Philippine Air Force (PAF), Bureau of Fire Protection (BFP), Department of Health (DOH), Department of Environment and Natural Resources (DENR), ken Office of the Civil Defense a mamagtipon tapno mangipaay iti tulong kadagiti naapektaran ti ginggined idiay Myanmar.
Gagem a mabigbig ti dedikasyon, kinatured ken panagkaykaysada nga isu ti nagbalin a tulbek iti balligi a misyon.
Maipalagip a timmama ti magnitude 7.7 a ginggined idiay Myanmar idi March 28, 2025 a nakatayan iti saan a nababbaba iti 3,000 a tattao.
