Temporario a sinuspenso ti Energy Regulatory Commission ti koleksion ti Green Energy Auction Allowance (GEA-All) kadagiti electric bill iti bulan ti Mayo ken Hunyo ita a tawen.
Ti GEA-All ket singir a maus-usar tapno pondoan dagiti renewable energy projects kas ti solar, wind ken hydro iti pagilian.
Segun iti ERC, gagem ti addang a maikkatan ti gastos dagiti consumer iti kuryente iti baet ti nangina a presio ti magatang ken global economic pressures.
Pinasingkedan pay ti komision a naan-anay ti pondo ti GEA-All nga umabot iti nasurok-kumurang P466.49 milyon tapno marisut dagiti obligasion kadagiti renewable developer iti panawen ti suspension.
Segun ken ni ERC chairperson Atty. Francis Saturnino Juan, makatulong ti addang tapno marisut ti dagsen iti mabayadan ti kuryente, bayat nga agtultuloy ti suporta iti panangiyakar ti pagilian iti nadalus nga enerhiya.
