Insingasing ti Department of Energy (DOE) ti in-inut a panangikkat ti non-technical system loss charges iti singir ti kuryente kadagiti consumer.
Segun ken ni DOE Undersecretary Riolita Inocencio, nakitinnulong ti DOE ken National Electrification Administration (NEA) para iti panangbukel ti plano iti phrased removal iti non-technical losses a pakairamanan ti panagtakaw iti kuryente ken illegal a koneksyon.
Kabayatanna, ti technical system loss ket ti normal a panagpukaw ti kuryente bayat a dumaldalan dayta kadagiti wire ken transformer.
Insingasing met ti NEA ti uppat nga stage tapno in-inut a maikkat ti system loss charges kadagiti bill ti kuryente.
Ti Stage 1 ket 25% ti non-technical system loss ti maikkat pakairamanan dagiti loss a nagsurok iti cap a maipalubos a maipasa iti consumers ti Energy Regulatory Commission (ERC); Stage 2 a 50% iti maikkat; stage 3 a 75% iti maikkat ken; Stage 4 a 100% ti non-technical system loss ti maikkat iti bill iti consumers.
Target ti NEA a rugian ti phased removal inton January 2027.
