Target ti Pilipinas a maikkatan ti 85% ti plastic pollution inton 2040 iti salinong ti baro a Philippine National Plastic Action Roadmap 2026-2040.
Inrusat ti Department of Environment and Natural Resources (DENR) ti roadmap kas tarabay ti national government, local governments, negosyo, komunidad ken dadduma pay nga stakeholders iti pananglapped ti plastic waste iti paggapuan na dayity ken panangpapigsa ti collection, recovery ken recycling.
Segun ken ni DENR Secretary Juan Miguel “Mitch” Cuna, agserbi daytoy kas blueprint tapno pagtiponen dagiti target ken programa, pagkaykaysaen dagiti polisiya ken maammuan no ania ti pakaibanagan nga husto ti investment.
Karaman pay iti plano ti panangallukoy dagiti prodyuser a mangaramid ti alternatibo kadagiti produkto kas ti sachet, a maibilang a dakkel a paset ti plastic pollution, idinto a mapapigsa ti partisipasion ti informal waste sector iti panagkolekta ti recyclable materials.
