Impaganetget ti Pilipinas ti nalaklaka a pannakagun-od iti climate financing a saan a mangpaadu iti utang ti pagilian iti 31st United Nations Climate Change Conference (COP31) idiay Antalya, Turkey.
Segun iti Department of Environment and Natural Resources (DENR), agkiddaw ti delegasion ti Pilipinas iti dakdakkel a pinansyal ken teknikal a suporta manipud iti internasional a komunidad, kangrunaan kadagiti grant-based funding para kadagiti programa ti aglawlaw ken proteksion kontra iti nakaro a pudot, layus ken napigsa a bagyo.
Ipakdaar ti DENR a mabalin a dumanon iti ₱645 bilion iti kada tawen ti lugi ti pagilian inton tawen 2030 gapu iti panagbalbaliw ti klima, idinto a mapattapatta a 11 milion a Filipino ti mabalin a makapadas iti napeggad nga indeks ti pudot a nasurok a 42 degrees Celsius inton tawen 2030.
Iduron pay ti Pilipinas ti target a 75% a pannakakissay wenno pannakaliklik ti greenhouse gas emissions manipud 2025 agingga 2035, babaen ti dakdakkel nga international financing, technology transfer ken dadduma pay a suporta tapno matungpal dagiti panagkumit ti pagilian iti climate.
