VIGAN CITY – Ingunam-gunam ni Senador Risa Hontiveros iti dakes nga epekto kadagiti babbai pakairamanan dagiti ubbing iti mapapati a modus operandi ti Bureau of Immigration kadagiti Chinese national kasukat ti kuarta nga inawaganna a “pastillas scheme”.
Ti pannaki-uman ti Bombo Radyo Vigan ken ni Hontiveros, sangapulo a ribo a pisos ti ibaybayad ti tunggal Chinese national kas service fee ket dua a ribo a pisos ti mapan iti airport immigration nga isu iti pagbibingayan dagiti empleyado ti BI idiay airport mismo idinto a burburtia pay la kadakuada no pakaitedan ti nabatbati a walo ribo a pisos.
Inaklon na a dakkel nga agpayso iti mapaspastrek iti gobyerno gapu kadagiti Philippine Offshore Gaming Operations (POGO) ngem isuda met laeng ti maysa kadagiti poon ken gapu na dagiti human trafficking, prostitusyon, illegal recruitment ken korapsyon a mapaspasamak.
Nangiyarigan na iti napasamak ti maysa a Taiwanese national a ti pagarup na ket agtrabaho ti maysa nga advertising company ngem nagbalin a bugaw ken ti maysa pay a balasang a nagbalin a prostitute.
Kabayatanna, mangnamnama ti senador nga agtignay ti Department of Justice inaig ti nasao a banag agsipud ta sakup da met ti Bureau of Immigration.
