Inyunay-unay ti House Committee on Justice a saan a napadaras ti proseso iti pannakawaswas dagiti dua nga impeachment complaint kontra ken ni Presidente Ferdinand Marcos Jr kalpasan a makita a daytoy ket saan a makanay ti substance-na.
Segun ken ni Vice Chairperson San Juan Rep. Ysabel Maria Zamora, nagbalin a naurnos ken silulukat ti panangtratar ti komite.
Nagbalin pay a nalukay ni Committee Chairman Batangas Rep. Gerville Luistro ken inikkanna iti naan-anay a gundaway dagiti amin a miembro ti komite nga agsarita iti panagdengngeg mainaig kadagiti reklamo kontra iti presidente.
Inlawlawag met ni Manila Rep. Joel Chua a saan a mabalin nga ibaga a napadaras ti decision ti komite ta amin a miembro, agraman dagiti endorser ti impeachment complaint ket nakipaset iti patangan, nakapagsarita, ken awan ti nagreklamo iti nagbalin a proseso.
