Imbilin ni Department of Transportation (DOTr) Sec. Vince Dizon ti immediate preventive suspension iti amin a Land Transportation Office (LTO) personnel a nainaig iti insidente idiay Panglao, Bohol idi Biernes February 28.
Ti addang ket kasaruno iti viral video a panangkemmeg dagiti LTO personnel iti maysa a lalaki a rider ta maysa kadakuada iti nangtenggel ti lalaki babaen iti tengngedna ken binutbutengda babaen ti kutsilyo.
Segun ti imbestigasyon ti Panglao Municipal Police Station, napasamak iti insidente bayat iti checkpoint iti LTO.
Nagpayam-ammo ti lalaki a mannalon ket kinapkapan ida dagiti LTO personnel a nakaalaan ti kutsilyo.
Adu ti babalaw a naawat iti social media dagiti enforcer kasaruno iti naranggas a panangkemmegda ti lalaki.
Nagkiddaw iti pammakawan ti LTO iti insidente ken inlawlawagda a kinatalged iti publiko ken personnel iti impangrunada.
