VIGAN CITY – Awan iti foul play iti pannakalmes iti maysa a mannalon a napan nagpana iti ikan iti baybay idiay Barangay Lingsat, Sta. Maria idi rabii ti June 3.
Nabigbig ti biktima a ni George Peralta nga agtawen iti uppat a pulo ket maysa, naasawaan, ken agnaed idiay Barangay Poblacion Norte, Burgos.
Segun ken ni Police Lieutenant Gilbert Tolosa, hepe ti Sta. Maria municipal police station, nakita dagiti mangngalap ti bangkay ti biktima a tumtumpaw iti kaadayo a sangagasut ket lima pulo a metro iti igid iti baybay iti nasao a lugar babaen ti flashlight a nakaputipot iti pungwa-pungwan na.
Maibasar iti imbestigasyon, alas sais y media idi rabii ti June 3 idi timmapog ti biktima ta mapan agpana iti ikan ket idi alas onse singkwenta ti rabii iti isu met laeng nga aldaw, adda iti tumtumpaw a flashlight a nakita dagiti sumagmamano a mangngalap iti lugar ket idi asitgan da, nakita da ti bangkay ti biktima.
