VIGAN CITY – Agtultuloy ti imbestigasyon ti Cabugao PNP inaig ti napasamak a pananglimlimo dagiti saan pay a nabigbig a suspek ti maysa a retirado a mangisursuro idiay Brgy. Bonifacio, Cabugao a nabigbig a ni Thelma Dampuan nga agtawen ti innem a pulo, naasawaan ken agnaed iti nasao a lugar.
Pinasingkedan ni Police Captain Ramil Llarenas, hepe ti Cabugao municipal police station, a nagpammarang ti maysa kadagiti suspek a kabagyan ti biktima ket inallukoy da nga alaen da dagiti alahas na ta dobliyen da iti presyo na.
Napan da iti pagtaengan ti biktima ket saan laeng nga alahas na iti inted na kadagiti suspek nu di ket pati ti kwarta na nga uppat a ribo a pisos, android tablet ken nangiwithdraw da pay ti lima pulo ribo a pisos iti ATM na.
Dagiti intaray dagiti suspek manipud ti biktima ket tallo a paris ti aritos, tallo a kwentas, dua a singsing, maysa a bangle ken maysa a porselas a ti pakabuklan a gatad na ket sangagasut tallo pulo ket siyam a ribo a pisos; android tablet nga aggatad ti sangapulo ribo a pisos ken cash money nga uppat a ribo a pisos.
Idi naalan dagiti suspek dagiti nasao nga alahas ken kwarta ti biktima, inyawat da kenkuana ti nangisit a bag nga inbaga da a naglaon iti adu a kwarta sa da pimmanawen ngem idi linukatan ti biktima iti bag, pappapel laeng iti karga na.
Segun ken ni Llarenas, binallaagan ti asawa na ti biktima a saan nga agtalek kadagiti immasideg kenkuana ta posible a modus da iti pananglimlimo iti inbaga da kenkuana ngem saan na nga inkaskaso.
