VIGAN CITY – Ad-adalenen ti Abra provincial government no ilukatda inton October 1 ti turismo kadagiti saan nga agindeg iti nasao a probinsia ken no ania dagiti proseso a masapul a suroten.
Iti pannaki-uman ti Bombo Radyo Vigan ken ni Gov. Joy Bernos, numan bilang maipalubos kadagiti residente iti sabali a lugar ket rumbeng nga adda ti medical certificate ken resulta ti Covid19 testing a maipakitada ken agparehistroda sakbayda a makastrek.
Iti agdama, dagiti laeng residente ti mapalubosan a mapan kadagiti nadumaduma a pagpasiaran iti Abra ngem kasapulanda latta a sumurot kadagiti protocol.
Malaksid ti dayta, impasigurado ti gobernador a makasoan dagiti aglabsing iti pagannurotan gapu ta adda manen ti dua a kaso ti Covid19 a nairekord ti nasao a probinsia a dagiti pasyente ket kameng ti Philippine National Police nga agpada a nagbakasyon a saan a pulos a naikammmayet kadagiti local government units.
Ingunamgunam ni Bernos nga uray no Authorized Persons Outside Residence ket rumbeng a saanda a mailaksid kadagiti protocols ta isuda ti rumbeng a pagtuladan ken pinalagipanna dagiti locally stranded individuals a makikammayet kadagiti local government units.
