VIGAN CITY – Pagyamanan ni Ilocos Sur Governor Ryan Singson dagiti nakitinnulong tapno bumaba iti bilang ti kaso iti covid-19 iti probinsia.
Segun ken ni Gov. Singson, babaen iti pannakitinnulong ti umili kangrunaan dagiti mayor ket epektibo ti pannakaipatungpal iti Modified Enhanced Community Quarantine (MECQ) kadagiti dua a siudad ken sangapulo ket maysa nga ili a nakaisakupanna iti uneg iti dua a lawas manipod April 7 agingga April 21, 2021.
Pakaragsakanna ta idi sakbay ti pannakaipatungpal iti MECQ ket nasurok uppat a gasut iti aktibo a kaso ngem iti agdama ket adda laengen iti nasurok sangagasut a kaso iti covid-19.
Nupay kasta ket impalagipna iti kanayon a panagbalin a disiplinado ken panangsurot latta iti health protocols tapno maliklikan iti panagado iti covid-19 case.
