VIGAN CITY – Sumurot kayo iti naiyetnag a pagannurutan tapnu sannak a mapursaran a mangdusa kadakayo, dayta iti bugas iti panagsarita ni Governor Ryan Singson iti pannaki-uman ti Bombo Radyo Vigan iti kangitingitan iti isyu ti coronavirus disease 2019.
Inulit ti gobernador iti bilin kadagiti aggapu kadagiti sabali a pagilian nga apektado ti COVID- 19 nga agself-quarantine da ket maka-ammo dagiti miyembro ti Barangay Health Response Team a mangmonitor kadakuada.
Kadagiti met pagadalan a saan a sumurot iti bilin na nga awan iti klase kadagiti pampubliko ken pribado a pagadalan iti amin a lebel ket dusaen na tapnu madisiplinaan da.
Ingunam-gunam ti gobernador a dagiti ipatpatungpal na a pagannurutan ket kas panangsurot iti bilin ni Presidente Rodrigo Duterte kadagiti amin a local government units a kitaen da iti pagsayaatan dagiti masakupan da tapnu saan da a maapektaran ti nasao a virus.
Malaksid iti dayta, inulit na pay a maiparit pay laeng dagiti mass gatherings wennu dagiti aktibidad a paga-aduan dagiti tattao a kayat na a sawen ket saan pay laeng a matuloy dagiti graduation wennu completion ceremonies a naka-schedule agingga April 12 a kas paset pay laeng iti panagan-annad kontra ti nasao a sakit.
Kabayatanna, natalgeden iti kasasaad dagiti tallo a persons under investigation iti coronavirus ditoy probinsia kas pinasingkedan ti Chief of Hospital a ni Dr. Trina Talaga.
Segun ken ni Talaga, agtaltalinaed pay laeng iti Ilocos Sur Provincial Hospital Gabriela Silang dagiti pasyente ta mayur-uray ti resulta ti dimmalananda a test a naipatulod idiay Research Institute for Tropical Medicine tapnu maamuan nu positibo da wennu saan ti COVID- 19.
