Kayat ni Senador Sherwin Gatchalian a papigsaen pay ti akem dagiti lokal a gobierno iti sektor ti edukasion kasaruno ti panang-singasing na ti panang-amyendar iti Local Government Code tapno mapangato ti pinansyal a kabaelan dagiti local government unit (LGU).
Segun ken ni Gatchalian, nasken a gundawayan ti daytoy a reporma tapno saan laeng a mapapigsa ti pondo ti LGU ngem mapasayaat pay ti kalidad ti edukasion.
Iti salinong ti gakat a 21st Century School Boards Act (Senate Bill No. 53), kayat a mapalawa ti komposision ken responsibilidad dagiti Local School Board tapno agbalin a mas epektibo ti akem da iti panangimaton ti edukasion iti lokal a lebel.
Karaman kadagiti responsibilidad dagiti board ti panangbukel dagiti pagannurotan a mang-pokus iti panangpasayaat ti kalidad ti edukasion iti lugar da.
