Mangar-aramid ti Department of Education ti polisiya tapno makissayan ti teaching load dagiti mangisursuro tapno maaddan da ti naad-adu nga oras a pokusan ti psychosocial well-being dagiti agad-adal.
Segun ken ni Education Undersecretary Malcolm Garma, nabukel ti polisiya kalpasan ti sumagmamano nga insidente ti pammaltog kadagiti pagadalan iti pagilian ita a tawen a nagresulta ti pannakatay ken pannakadunor ti sumagmamano nga estudyante.
Pinasingkedan ni Garma a kasapulan a palawaen ti digital safety programs ti DepEd para kadagiti estudyante ken school personnel.
Segun iti opisial, saan laeng a pisikal a panagsagana dagiti pagadalan ti kasapulan tapno maliklikan ti shooting incident, gapu ta adda impluwensia ti online activities ken pannakisali kadagiti online group.
