VIGAN CITY – Kinontra ti ACT Teachers Partylist ti Teacher’s Partylist ti plano ti Department of Education a mayatiddug ti school year ken maipabassit ti summer break ta masapul nga ikonsidera ti kasasaad dagiti mangisursuro a mabanbannug iti blended learning.
Iti pannaki-uman ti Bombo Radyo Vigan ken ni Rep. France Castro, nasaysayaat no saganaanda laengen ti sumaruno nga acaedmic year ken adalen no kasano iti natalged a wagas iti panaglukat ti face to face learning agsipud ta adu nga estudianten ti marigatan iti sistema ita ti panagadal ket kayatda ti sumrek iti pagadalan.
Insingasing ti grupo a ti bakasyon dagiti mangisursuro ken estudiante ket usarenda a mang-evaluate iti blended learning ken mangisagana kadagiti pasilidad.
Kayatda nga in-inut a malukatan ti face to face learning nangruna kadagiti low-risk area babaen ti maaramid a mass testing kadagiti mangisursuro kasta payen ti pannakaipangrunada iti covid19 vaccination program ta naudin ti pagilian a mangipatungpal ti nasao nga addang.
Kabayatanna, kiniddaw ti kongresista a maipaayan iti supplemental budget ken masolusyonan iti parikut dagiti mangisursuro iti internet allowance kasta payen ti panagpangato iti sueldoda.
