VIGAN CITY – Pinaglibakan ti National Disaster Risk Reduction and Management Council (NDRRMC) iti agwarwaras a damag a rarauten wennu ser-serreken ti Office of the Civil Defense dagiti ospital ditoy pagilian ta agala da kadagiti medical supply nga ited da kadagiti frontliners.
Ti pannaki-uman ti Bombo Radyo Vigan, inawagan ni NDRRMC- OCD spokesman Mark Timbal a fake news iti nasao a damag agsipud ta dagiti iwarwaras da a medical supply ken personal protective equipment kadagiti frontliners kontra COVID-19 ket nagatang babaen iti pondo ti gobyerno ken in-donar dagiti naduma-duma a grupo ken tattao.
Malaksid kadagiti medical supply, adda pay dagiti maiwar-waras a bottled water para kadagiti fronliners a naggapu met laeng ti government procurement ken donasyon nga inawat ti OCD.
Mainaig dayta, inallukoy ti opisyal iti publiko a liklikan iti pangiwaras kadagiti peke a damag ket makitinnulong da laengen a mangparmek iti nasao a sakit babaen iti panagtalinaed da iti uneg iti pagtaengan ken panangsurot kadagiti protocol nga inyetnag ti Department of Health ken Inter-Agency Task Force on Emerging Infectious Diseases.
