Aminado ti Department of Labor and Employment wenno DOLE a maaddaan ti domino effect ti pannakakissay ti budget ti Tulong Panghanapbuhay sa Ating Disadvantaged-Displaced Workers wenno TUPAD program para inton 2026.
Iti panagtratar ti gakat a pondo ti DOLE, naibaga a P11 billion laeng iti nailatang para ti TUPAD inton sumaruno a tawen kalpasan a nakissayan ti 36 percent wenno katukad iti P6 billion.
Gapu dayta ket makissayan ti maysa a million manipod iti nasurok uppat a million a benepisyaryo iti programa.
Segun ken ni DOLE Assistant Secretary Amuerfina Reyes, maaddaan dayta iti epekto ti kabaelan iti gobierno a mangted iti tulong kadagiti umili a kellaat a naawanan iti trabaho.
Impaganetget ni Reyes a nu man pay temporaryo a trabaho laeng ti maipapaay ti TUPAD ket agserbi dayta a salbabida para kadagiti pamilia a naawanan iti pagsapulan nangruna iti panawen ti emergencies wenno didigra.
Maibasar iti listaan, iti salinong ti 2025 General Appropriations Act, P17.3 billion ti pondo ti TUPAD a target ti 1.7 million a benepisyaryo.
Agingga September 2025 ket naaramaten ti P10.87 billion a pondo a nakatulongen iti 1.52 million beneficiaries.
