VIGAN CITY – Inikkat ni Presidente Rodrigo Duterte iti responsibilidad dagiti pulitiko iti panagiwaras ti relief packs ken cash assistance kadagiti apektado ti enhanced community quarantine gapu ti coronavirus disease 2019 ta maka-ammon ti Department of Social Welfare and Development iti panangidaulo ni Secretary Rolando Bautista ta adda rekord da kadagiti napanglaw a pamilya nga agkasapulan unay iti tulong.
Ti public address ni Presidente Duterte idi rabii, nadlaw na nga adda iti pinnulitika a mapaspasamak nu dagiti nabotosan nga opisyal kas kadagiti mayor ken barangay chairman iti agiwaras kadagiti tulong a para kadagiti naapektaran nga umili.
Ti tulong nga ited ti DSWD manipud ti national government ket sabali laeng iti tulong nga ited dagiti local government units manipud kadagiti pondo da.
Kabayatanna, binallaagan ti presidente dagiti mangdangran wennu mangdiscriminate kadagiti frontliners iti laban kontra COVID- 19, nangruna dagiti health workers.
Inbilin na a masapul nga adda dagiti pulis a mangkita iti seguridad ken kinatalged dagiti health workers ta adda dagiti naawat na a report nga adda dagiti health workers a nadangran ta karugit wennu kagura ida dagiti sumagmamano a tattao ta ipagarup da nga agiwaras da ti virus nu makita da ida iti ruwar dagiti ospital wennu health facilities a pagtrabtrabahoan da.
