Idurduron ti maysa nga organized labor iti pannakaikkat ti Philippine Health Insurance Corp. board members kalpasan ti zero subsidy nga inlatang iti kongreso para inton 2025 iti PhilHealth gapu iti saan a nasayaat a pannakaaramat ti pondo a mangkompromiso iti salun-at iti publiko.
Nagpanawagan ti Labor coalition NAGKAISA iti Kongreso a salakniban dagiti mangmangged a Pilipino babaen ti panangallukoy ken ni President Ferdinand Marcos Jr. nga ikkaten ti agdama a liderato ti PhilHealth ken board members.
Segun ti coalition, imbes a parigatan dagiti mangmangged gapu iti madi sistema ket masapul nga iduron iti Kongreso ti pannakadusa ti liderato ti PhilHealth.
Impaganetgetda iti rumbeng a panagtignay ti Marcos administration sakbay a maudi iti amin ta salun-at dagiti Pilipino iti agur-uray.
Kiddaw ti coalition ti pudno a reporma iti PhilHealth tapno masiugurado nga amin a Pilipino ket maaddaan ti access iti dekalidad ken nalaka a health care nga awan ti pagbutngan iti utang wenno hospital detention.
