Suportado ni Senador Bam Aquino iti panagdeklara ti state of national emergency tapno makontrol ti agtultuloy a panagngina ti presio ti magatang gapu ti panagngato ti gatad ti langis iti tengnga ti tension idiay Middle East.
Segun ken ni Aquino, makatulong ti addang tapno marisut ti gobierno ti epekto ti record-high a presio ti produkto petrolyo ken kasaruno daytoy ti panagngato ti presio dagiti magatang nga agbalin a dagsen iti publiko.
Iti salinong ti state of national emergency, mabalin nga usaren ti Presidente ti nalawlawa a bileg na tapno ipokus ti pondo ti gobierno iti panangited ti pinansyal ken dadduma pay a tulong iti agduduma a sektor.
Nupay kasta, pinasingkedan ti opisial ti nainget a panangbantay iti panangipatungpal ti addang tapno masigurado a ti tulong ket makadanon iti nasken a benepisyaryo ken maliklikan ti aniaman a panagabuso ken irregularidad.
