Naala dagiti otoridad ti P200 million a gatad ti smuggled frozen mackerel iti Port of Manila isu a dagus nga impanawagan ti maysa a farmer’s group ti pannakaipila ti kaso kontra kadagiti responsible iti panagpuslit.
Segun iti Agricultural Sector Alliance of the Philippines, awan ti nakemmeg ken naibalud kasaruno iti pannakakumpiskar ti illegal shipment ti Department of Agriculture ken Bureau of Customs.
Kinuna ni AGAP paty-list Rep. Nicanor Briones a ti panagpuslit ti agricultural ken fishery products ket maibilang nga economic sabotage, a maysa a non-bailable crime.
Naideklarar a fried taro sticks, cuttlefish-flavored balls ken taro sweet potato balls dagiti duapulo ket maysa a shipping containers manipod china ngem naglaon iti 720 metric tons iti mackerel.
Mapapati a pineke ti owner ken broker iti shipment dagiti dokumento para iti panagpuslit kadagiti nasao nga ikan.
Duapulo ket walo a kompania ti nairaman iti blacklist a ti uppat ket nakasoan.
Nagyaman ni Briones ken ni Customs Commissioner Ariel Nepomuceno ken Agriculture Secretary Francisco Tiu Laurel Jr. iti pannakaala ti nasao a shipment.
