Pinasingkedan ti Malakanyang a mangrugi ita nga aldaw ket mairanud iti amin a residente iti probinsia ti Cebu ti P20 kada kilo ti bagas babaen ti Kadiwa stores kas paset ti pilot rollout ti rice subsidy program iti gobierno.
Inlawlawag ni Presidential Communications Undersecretary ken Palace Press Officer Claire Castro a saan laeng a dagiti indigent wenno vulnerable sectors iti sakup iti nasao a programa ta silulukat dayta para iti publiko.
Ti rice subsidy program ket maysa kadagiti kangrunaan a kari ni President Ferdinand Marcos Jr. a gagem a maiyasideg kadagiti Pilipino iti nalaka a bagas.
Segun ken ni Agriculture Secretary Francisco Tiu-Laurel Jr., agpaut ti pilot implementation agingga December 2025 ken manamnama ti mass rollout inton 2026.
Karaman dagiti addang a maikonkonsiderar para ti full implementation ti panagbukel ti software system ken identification card system tapno mamonitor iti kaadu ti bagas a magatang ti tunggal benepisyaryo.
Siguradoen ti Department of Agriculture a napalaus iti panagsagana tapno masigurado a naurnos ken sustainable iti pannakaipatungpal ti nasao a programa.
