Arigna doble iti agdama a minimum wage iti inaldaw-aldaw a gastos iti maysa a pamilia a Pilipino kas kinuna ti IBON Foundation.
Segun ti IBON, kasapulan a makasapul iti P1,216 kada aldaw iti maysa a pamilia a Pilipino manipod iti agdama a minimum wage a P645 idiay Metro Manila tapno maipaay dagiti kasapulan para iti inaldaw-aldaw.
Gapu dayta ket adu dagiti mapilitan a sumrek iti trabaho uray nababa iti sueldo wenno agutang tapno maisakad iti inaldaw aldaw a panagbiag gapu iti dakkel a nagbaetan ti sueldo ken actual a kasapulan ti maysa a pamilia a Pilipino.
Manipod 2008, saanen a mangir-iruar ti gobierno ti family living wage isu a ti IBON ti nangrugi a nag-update kas maibasar iti inflation kas kinuna ni IBON Executive Director Sonny Africa.
Iti agdama ket mapatta-patta a P1,216 iti kasapulan a sapul iti maysa a pamilia nga adda lima a miembrona.
Sangapulo ket lima a porsiento a Pilipino iti agtaltalinaed a narigat gapu iti nabuntog a panagregta iti ekonomia, pagkurangan ti industrialization ken nabaybay-an nga agrikultura.
Idi laeng kallabes ket inaprubaran ti Kamara de Representantes ti gakat a nayon a P200 iti minimum wage iti pribado a sektor ngem kinuna ni President Ferdinand Marcos Jr. nga ad-adalenna iti posible nga epektona dayta iti ekonomia.
