VIGAN CITY – Nasarakan ti maysa a mangngalap ti sangapulo ket walo a pakete ti shabu a mapatta-patta nga aggatad ti P120 million iti kabaybayan a 16 nautical miles manipod Brgy Villamar, Caoayan, Ilocos Sur itay alas dies baente nuebe iti bigat, June 26, 2024.
Iti pannaki-uman ti Bombo Radyo Vigan ken ni Edgardo Dalgo a taga- Barangay Bia-o, Sta. Maria, bayat ti panagkalapna iti nasao a kabaybayan ket nakitana nga adda tumtumpaw a nangisit a langgusti isu nga inasitganna ket idi nakaasideg, impagarupna a basura.
Segun kenkuana, apaman a linukatanna ket nakigtot laengen ta shabu ti madiskubrena isu a dagusna nga imbangkag ket impakaammona kadagiti pannakabagi ti linteg ti nakitana ket nakumpirmaran a shabu dagiti nasarakanna.
VIDEO – EDGARDO DALGO
Segun met ken ni PBGen. Lou Evangelista a Regional Director iti Police Regional Office-1, gapu kadagiti nadiskubre a shabu ket paingetan pay dagiti otoridad ti panagbantay ken panagmonitor tapno masigurado nga awan ti ilegal nga aktibidad a mapasamak iti probinsia.
Dagiti nasao a kontrabando ket adda Chinese markingsna isu a patienna a natinnag laeng bayat a maibibiahe a maipan iti sabali a pagilian.
Manamnama a bumisita dagiti kameng ti Philippine Coast Guard, Philippine National Police, Philippine Drug Enforcement Agency ken government officials iti nasao a lugar tapno paliiwen nu adda pay dagiti kontrabando a nababati.
Maipalagip nga idi Lunes, June 24 ket nasarakan iti kabaybayan wenno 16 nautical miles manipod Barangay Solotsolot, San Juan, Ilocos Sur iti duapulo ket uppat a pakete iti shabu a mapatta-patta nga aggatad ti P163.2 million babaen kadagiti nakakita nga uppat a mangngalap nga agnaed iti nasao a barangay.
VIDEO – REGIONAL DIRECTOR PBGEN. LOU EVANGELISTA
Impasigurado ni Sta. Maria Mayor Michael Florendo a maikkan ti pammadayaw ni Edgardo Dalgo para iti inaramidna a panangiturn-over kadagiti otridad dagiti nadiskubrena a shabu.
Segun ken ni Forendo, umuna a gundawayna a makakita iti kasta a kadakkel a gatad ti shabu iti lugarda.
Balakadna kadagiti umili nga agbalin anaalibtak nangruna nu makakitkitada kadagiti kas ti nasarakan ti nasao a mangnglap.
VIDEO – Sta. Maria Mayor Michael Florendo
