Kinumpirmaran ti Malakanyang nga inruaren ti Department of Budget and Management (DBM) ti 2026 budget para kadagiti local Government units (LGUs).
Segun ken ni Palace Press Officer Usec. Claire Castro, paset dayta iti bilin ni Pres. Ferdinand Marcos Jr. a masigurado ti pondo iti gobierno ket napaspas a maipatulod ken marikna dagiti umili.
Umabot iti P1.19 trillion ti National Tax Allotment (NTA) iti maiwaras kadagiti LGUs para iti agdama a tawen.
Kinuna ni Castro a pinirmaanen ti Special Allotment Release Order (SARO) ken ti mayannatup a Notices of Cash Allocations (NCA) idi January 26 ken direkta a simrek iti authorized government servicing banks kadagiti LGU kasaruno iti maipatpatungpal a budgeting, accounting ken auditing rules.
Naammoan a ti nasapa a pannakairuar ti alokasyon ket pammaneknek a nakatutok ti 2026 budget iti panangpadur-as iti panagbiag dagiti umili.
Kinuna ni Castro nga ipangrunada iti serbisyo, panangpapigsa iti lokal a gobierno ken maipasigurado a napaspas iti pannakaidanon ti programa a direkta a marikrikna dagiti komunidad.
