VIGAN CITY – Dead on arrival ti maysa nurse a nagmaneho iti motorsiklo gapu ti pannaka-aksidentena idiay Diversion Road, sakupen ti Barangay Parioc 1st, Candon City, Ilocos Sur.
Nabigbig ti biktima a ni Jay Lord Mecos Briones, agtawen iti tallopulo ket walo, taga-Barangay Bagani Campo, Candon City.
Nagreport ni Jeralyn Garnace Castillo iti Candon City Police Station a ti kasinsinna ket naaksidente iti nasao a lugar isu a nagresponde nga insigida dagiti pannakabagi ti linteg.
Maibasar iti imbestigasyon, agpapa-abagatan ti motorsiklo iti heroes bypass road ket idi madanunna ti nakapasamakan ti insidente, nadungparna ti concrete ken steel barrier iti laud a paset ti kalsada, isu a nagslide iti mapapati a duapulo a metro ti distansyana.
Gapu dayta, nadunor ti nadumaduma a paset ti bagi ti drayber a naipaagas iti Ilocos Sur Medical Center ngem saanen a nakalasat.
