Naka-standby iti nasurok sangagasut a tattao nga ipatulod iti Pilipinas idiay Myanmar tapno tumulong iti search and rescue operations ken mangipaay ti humanitarian assistance kadagiti naapektaran ti magnitude 7.7 a ginggined idi Biernes.
Karaman iti emergency search and rescue teams dagiti addaan ti K9 wenno SAR dogs, medical assistance teams, agas, medical equipment, emergency first aid kits, mobile generators, water sanitation kits, solar-powered lights ken temporary shelters.
Segun iti National Disaster Risk Reduction and Management Council, karaman iti maipatulod ti tallopulo ket maysa a miembro ti Philippine Emergency Medical Assistance Team manipod iti Department of Health.
Adda pay saggaysa a light Urban Search and Rescue Team manipod Bureau of Fire Protection, Armed Forces of the Philippines, Metropolitan Manila Development Authority ken Apex Mining Corporation wenno First Gen-Energy Development Corporation SRR Teams nga adda pakabuklan a walopulo a tattao.
Manamnama a mangrugi iti deployment inton bigat, April 1 nga agpaut iti dua a lawas.
