Mapatta-patta iti 1,400a piraso iti tulang ti tao iti narekubre iti Taal Lake kas paset ti imbestigasyon iti kaso dagiti mapukpukaw a mannadi kas kinuna ti Philippine National Police (PNP).
Segun ken ni PNP Forensic Group Director Police Colonel Pierre Paul Carpio, nakitada dayta manipod iti naisayangkat a 134 disaster victim identification operations manipod pay idi June 2025.
Umaboten iti 2,000 nga ebidensya iti naala manipod kadagiti operasyon pakairamanan dagiti tulang ti tao ken ayup, dagiti personal nga alikamen ken dadduma pay nga artifact.
Naidalan dagiti narekubre iti agduduma a forensic examinations kad iti DNA testing, dental ken anthropological analysis.
No pay kasta, marigatan dagiti eksperto iti panangbigbig iti kinatao gapu ta acidic ti danum ken nangato a temperatura iti dan-aw a mangpadpadaras iti pannakadadael dagiti tulang ken DNA.
Gapu dayta ket ad-adalenen iti PNP ti panagkiddaw ti tulong kadagiti laboratoryo iti dadduma a pagilian pakairamanan iti Japan ken University of the Philippines tapno mapapigsa ti proseso a panangammo kadagiti nasarakan.
