VIGAN CITY – Nasurok-kumurang 37.23 a gramo ti mapapati a shabu wenno aggatad ti P253,164 ti naala manipod ken ni alyas Puraw a nakemmeg iti naisayangkat a buy-bust operation itay ala una singkwentay uno iti bigat idiay Barangay Oaig-daya, Candon City, Ilocos Sur.
Ti nakemmeg a suspek ket agtawen-iti-duapulo ket tallo, baro, awanan ti trabaho, Street Level Individual nga agnaed idiay Sitio Parada, Brgy. Napo, Magsingal idinto a nakalibas ti kakaduana.
Iti pannaki-uman ti Bombo Radyo Vigan ken ni PLt. Col. Jessie Balinang a hepe ti Candon City Police Station, idi naisayangkat ti operasyon ket nakadlaw dagiti suspek a police ti katransaksyonda isu a nagpaputokda agingga naglibasda ngem nakemmeg ni alyas Puraw idinto a nakalibas ti kakaduana.
Segun ken ni Balinang, nasarakanda laengen ti lugan idiay Santiago a naabandona karamanen dagiti gamitda.
Naala manipod ti suspek ti drug evidence a lima a piraso ti large heat-sealed transparent plastic sachet ken maysa a piraso ti heat-sealed transparent plastic sachet.
Naala pay ti non-drug evidence a dua a piraso ti black coin purse, maysa a unit ti blue Realme cellular phone, uppat a pulo ket upppat a piraso ti sangaribo a pisos a nagserbi a boodle money, dua a piraso ti sangaribo a pisos a genuine money ken P122.
VIDEO – PLT. COL. JESSIE BALINANG
