Maisagsaganan ti kaso a maipila kontra kadagiti 4 a suspek a nanglimlimo kadagiti 3 nga store owner idiay Barangay Oaig Daya, Candon City, Ilocos Sur.
Dagiti suspek ket pakairamanan dagiti 3 a babai ken maysa a lalaki nga agpapada a taga-Taguig City, idinto a dagiti 3 a biktima ket agpapada nga agnaed iti Oaig Daya.
Iti pannaki-uman ti Bombo Radyo Vigan ken ni PLT. Jovelyn Antalan, nagaramat dagiti suspek iti peke a sangaribo a pisos a gimmatang iti store dagiti biktima.
Napan nag-cash-in ti suspek iti P2,000 ngem idi binilang ti biktima ti kuarta, nadlawna a kasla peke ti P1,000, idinto a dagiti 10 a P100 ket pudno a kuarta.
Impasukimat pay ti biktima ti kuarta iti anakna nga agub-ubra iti bangko ket naduktalan a pudno a peke ti imbayad kenkuana ti suspek.
Uray ti maysa met laeng a biktima ket nadlawna a peke ti kuarta idi gimmatang ti suspek kenkuana iti sabon ken nagpa-cash in iti P300.
Naipan dagiti suspek iti Candon City Police Station ket idi makapkapanda, naala manipud kadakuada ti nasurok P39,000 a gatad ken ti peke a P1,000.
