VIGAN CITY – Mapatta-patta nga umabot iti sangagasut a ribo a pisos iti gatad ti nasurok lima gasut a kilo ti imported a karne ti manok a naggapu idiay United Kingdom a nakumpiskar ti provincial quarantine office idiay Ambulogan, Narvacan idi kalman, April 3, alas nuwebe y media ti bigat.
Segun ken ni provincial quarantine officer Martel Quitoriano, idi pay laeng napan a lawas a sinip-siputan da ti nasao a refrigerated van a minaneho ni Furtunato Palana Valida Jr., nga agtawen iti tallo pulo ket walo, naasawaan ken agnaed idiay Sapang Palau, Del Monte, Bulacan.
Posible a nairana a madama ti inspection da idi limmabas iti nasao a van idiay quarantine checkpoint ti Tagudin isu a nakalasat ket nakastrek ditoy probinsiya idi napan a lawas.
Nakumpiskar dagiti karne ti manok nga iligal a naiserrek ditoy probinsiya a nailugan iti nasao a van nga awan iti naan-anay a dokumento na ket nakasagana a maited kadagiti asosasyon ken grupo a siguden a tultulungan iti provincial government.
