Sangapulo ket siam a barangay manipod uppat nga ili idiay Sorsogon iti naapektaran ti ash fall iti panagalburoto iti Bulkang Bulusan.
Iti kaudian a pakaammo ti Office of the Civil Defense, karaman dagiti naapektaran iti ili ti Bulan, Irosin, Juban ken Magallanes.
Nagpalagip manen dagiti otoridad iti panagannad dagiti umili kangrunaan kadagiti adda sakitna iti panaganges a suroten ti pagannurotan tapno maliklikan iti madi nga epekto iti panaglang-ab iti dapo.
Immunan a nairekord ti OCD ti 14,830 a pamilia wenno 74,209 nga indibidual ti naapektaran iti panagbettak iti bulkan a ti sangapulo ket siam a pamilia wenno 61 nga indibidual ket agtaltalinaed kadagiti evacuation center.
Iti agdama ket naka-Alert Level 1 wenno Low-Level Unrest ti Alert status iti Bulkang Bulusan.
