Makitaripnong ni Senate Committee on Foreign Relations Chairman Sen. Erwin Tulfo kadagiti opisial ti Department of Foreign Affairs ken Department of Migrant Workers mainaig iti nasken nga aramiden kadagiti nasurok kumurang duapulo ket uppat a Pilipino a seaferers nga agdama a nakalugan iti sumagmamano a barko ti Russia.
Segun ken ni Senador Tulfo, masapul a maammuan no ania ti mabalin nga addang ti DFA ken DMW para iti kinatalged dagiti seaferers.
Ti impormasion mainaig ti bilang dagiti Pilipino a seaman ket imbingay ni Ukraine Ambassador Yuliia Fediv ken Tulfo idi nag-courtesy call ti nadakamat a diplomat iti senador idi napan a lawas.
Iti nadakamat a courtesy visit, kiniddaw ni Tulfo ken Ambassador Fediv no mabalin a kapatang ti Filipino prisoner of war Raymon Santos Gumangan ti pamilia na uray no telepono laeng.
Inkari met ni Fediv a tumulong isuna tapno makapatang ni Gumangan ti naibati na a pamilia dituy Pilipinas.
