Pinasingkedan ni Philippine National Police Spokesperson Police Colonel Jean Fajardo a posible nga agbalin nga state witness ti nagmaneho ti lugan a nakaipanan dagiti bangkay da Geneva Lopez ken Israeli a nobyona a ni Yitshak Cohen ken nangitudo kadagiti otoridad ti nakaipanan dagiti bangkay dagiti agayan-ayat.
Segun ken ni Fajardo, karaman a person of interest iti nasao a kaso ti mekaniko a ni alyas Junjun nga inayaban dagiti suspek a mangsimpa koma ti heavy equipment ngem nakigtot ta nakitana laengen a natay dagiti dua iti uneg ti lugan idi imbagada nga imanehoanna ida.
Kinuna ni Junjun a karaman iti plano nga agsapul ti heavy equipment a maaramat koma a pagkali ngem saan a natuloy isu a nabilin nga uramenna ti lugan dagiti biktima, isu a nauram iti igid iti kalsada idiay Capas, Tarlac idi June 22, maysa nga aldaw kalpasan a napapatay dagiti biktima.
Naidiaya ken ni Junjun ti P50,000 tapno agulimek inaig ti nasao a pasamak ngem saan a napasamak.
Ad-adalen dagiti otoridad nu mabalin a maaramat nga state winess ni Junjun kontra kadagiti main suspect.
Adda pay dua a sibilyan a karaman iti krimen a sapsapulenen dagiti otoridad.
