Mapapati a nakasaksak a charger iti nagtaudan iti uram iti maysa a pagtaengan idiay Barangay Panay Norte, Magsingal, Ilocos Sur itattay (January 20, 2025).
Segun ti Magsingal Municipal Police Station, ti akin-kukua iti pagtaengan ket ni Gerry Vivit Fagela Sr., agtawen iti limapulo ket siam, mannalon nga agnaed idiay Barangay Napo, Magsingal.
Nagresponde dagiti kameng ti Bureau of Fire Protection-Magsingal ken Magsingal Municipal Police Station iti tawag a naawatda inaig iti pannakauram iti maysa a pagtaengan idiay Panay Norte, Magsingal.
Segun ken ni Geli Anne Tacla Fagela, a putot ni Gerry, pimmanaw iti pagtaenganda iti alas dies itay bigat idin adda timmawag kenkuana a maur-uram iti pagtaenganda.
Naduktalan dagiti kameng ti BFP a nagtuad iti uram iti kuarto ni Geli a mapapati a gapu iti nabaybay-an a nakasaksak a charger nga awan iti cellphone-na.
Nupay kasta ket kalpasan iti tallopulo a minutos ket nadepdep iti apoy ket partial laeng iti nauram.
Kabayatanna, awan iti nadangran iti nasao nga uram ken saan pay nga ammo nu mano iti gatad dagiti nadadael a sanikua.
