Naibutaktak ti House Quad Committee hearing ti nakaskasdaaw a rekord manipud iti Dangerous Drugs Board (DDB) a mangipakpakita iti panagbaba ti bilang dagiti agus-usar iti droga iti Pilipinas uray sakbay pay ti Duterte administration war on drugs.
Indatag ti DDB dagiti resulta manipud iti National Household Survey, a naaramid sipud pay idi 2004, babaen ti face-to-face interviews nga adda representative sample ti populasion tapno mapattapatta ti bilang dagiti agdama nga agus-usar iti droga.
Maibasar iti rekord ti surbey, bimmaba dagiti agus-usar iti droga manipud 6,765,773 idi 2004 agingga iti 1,718,855 idi 2008, wenno 74.59 a porsiento a panagbaba.
Nagtultuloy daytoy bayat ti administrasion ni Aquino, nga ad-adda a bimmaba ti bilang agingga iti 1,319,135 idi 2012.
Segun ti DDB, ti panagbaba ket gapu kadagiti naballigi nga international control frameworks, policy implementation, ken various drug reduction efforts, agraman dagiti preventive education, treatment, ken rehabilitation programs.
Nupay kasta, impakita ti survey idi 2015 nga immadu iti 33.09 a porsiento dagiti agus-usar iti droga, a dimmanon iti 1,755,654.
Inlawlawag ti DDB a daytoy nga iyaadu, ket gapu iti panagngato ti admissions kadagiti treatment ken rehabilitation centers.
Iti laksid ti war on drugs, nagtultuloy a bimmaba ti bilang dagiti agus-usar iti droga, a dimmanon iti 1,675,122 idi 2019 ken 1,479,131 idi 2023.
Nasdaaw dagiti agpapanday-linteg iti nasao a rekord, partikular ti rinibu a natay kabayatan ti drug war ti administrasion ni Duterte.
Pinagduaduaanda ti kinaepektibo ti war on drugs, uray no bassit laeng ti bimmabaanna.
